Македонскиот Алшар во американскиот фокус

Македонија повторно може да влезе во американскиот фокус – ретките минерали ја прават атрактивна за стратегијата на Трамп.

Економската политика на Доналд Трамп се заснова на три приоритети: укинување царини за американските производи, враќање инвестиции во САД и обезбедување пристап до ретки метали. Токму затоа Македонија би можела да стане интересна точка за Вашингтон, ако темата за ретките минерали се отвори во стратешкиот дијалог меѓу двете земји. САД веќе имаа интерес за рудникот „Алшар“, единственото светско наоѓалиште на лорандит. Дополнително, новооткриениот литиум во јужна Србија – непосредно до македонската граница – отвора прашање дали исти геолошки формации постојат и кај нас. Според професорот Дејан Трајковски, регионот Пелинце – Враготурце – Козјак е најверојатен кандидат. Потврда на резерви би можела да значи нови работни места, поголеми државни приходи, отворање истражувачки центри и посилен меѓународен статус за Македонија. Примерот на Грција, која склучи договор со ExxonMobil врз база на индиции, покажува дека вакви партнерства се можни. Клучно е Македонија да побара од САД ангажирање експертски тим за заеднички истражувања. Ако резултатите се позитивни, земјава може да стане дел од американските стратешки интереси во регионот.