Кривична пријава против поранешен Градоначалник на Свети Николе

Денес Министерот за внатрешни работи објави дека МВР поднесе кривична пријава за злоупотреба на службената положба против поранешен Градоначалник.

ОВР Свети Николе поднесе кривична пријава против С.В. (53) од Свети Николе, за сторено кривично дело „злоупотреба на службената положба и овластување“. Пријавениот во 2021 година, во својство на Градоначалник на Општина Свети Николе, за реализација на проектот за изградба на фекална канализација во населено место „Рудина“, спротивно на законските одредби и со пречекорување на своите овластувања спровел јавна набавка и склучил договор со скопска фирма во вредност од 1.649.400 денари, а во текот на градбата бил склучен и анекс договор во вредност од 329.806 денари за непредвидени и дополнителни работи. Во исто време во 2021 година, повторно спровел јавна набавка за тампонирање и чистење на улиците во Свети Николе со градежна механизација во вредност од 2.500.000 денари со тетовско правно лице, кое по одобрение на градоначалникот спротивно на одредбите од договорот го ископало ровот за фекалната канализација. Од извршените проверки било утврдено дека за проектирана вредност на фекална канализација од 1.996.082 денари, биле платени 4.761.957 денари.